Un mozo de 19 anos perdeu a vida esta madrugada en Gondomar ao saírse da vía o coche que conducía e chocar contra un muro. No vehículo viaxaban outros tres mozos de entre 16 e 18 anos que foron trasladados feridos o Hospital Álvaro Cunqueiro de Vigo.
Segundo información do 112, o suceso tivo lugar ao redor das 5,00 horas da madrugada deste domingo na PO-340, máis concretamente á altura da gasolinera de Mañufe, na recta que une os municipios de Gondomar e Nigrán.
Tras o sinistro, o Centro Integrado de Atención ás Emerxencias (CIAE) recibiu a chamada de alerta de varias persoas para solicitar asistencia médica urxente para os ocupantes do turismo.
Deste xeito, os xestores do 112 puxeron en alerta a Urxencias Sanitarias-061, aos bombeiros de Baixo Miño e Vigo e aos axentes da Garda Civil de Tráfico. Tamén solicitaron a colaboración dos membros do grupo de emerxencias supramunicipal (GES) de Val Miñor e do persoal da Axencia Galega de Infraestruturas.
Fontes do 061 consultadas por Europa Press indican que había catro mozos no interior do coche. Destes, A.D.M., o condutor de 19 anos e veciño de Baredo (Baiona), faleceu a causa do choque.
Os outros tres ocupantes do vehículo eran dúas mozas de 16 anos e outro mozo de 18, que resultaron feridos e tiveron que ser trasladados ao Hospital Álvaro Cunqueiro polos servizos sanitarios.
Pola súa banda, fontes do GES de Val Miñor relataron que se trata dun accidente “moi forte” no que 2 das catro persoas que viaxaban no coche tiveron que ser excarceradas.
Ata o punto desprazouse un equipo de atestados para investigar o ocorrido, explican estas mesmas fontes a Europa Press.