Axentes da Policía Local de Vigo detiveron a un veciño da cidade, de 33 anos de idade, como presunto autor de catro roubos con forza cometidos na cidade nos últimos meses.
Segundo informaron fontes policiais, a investigación iniciouse tras a denuncia dun roubo cometido en xullo pasado, nun establecemento de hostalaría da rúa Santa Ana. Alí, alguén forzara a porta de acceso.
A medida que avanzaba a investigación deste caso, producíronse na cidade outro tres roubos con características similares ao de xullo, o que levou á Policía a pensar que o autor podería ser a mesma persoa.
As pescudas policiais permitiron identificar ao presunto ladrón, que foi localizado e detido na tarde deste xoves. Unha vez trasladado a Comisaría, comprobouse que ten 14 antecedentes policiais, varios deles por roubo con forza.
Ademais, a Policía non descarta imputarlle outros roubos que están a ser investigados. O detido e as dilixencias practicadas foron postos a disposición do xulgado de instrución número 4 de Vigo.