O axente da Unidade de Intervención Policial (UIP) da Comisaría de Vigo, Iván A.F., que resultou ferido grave o pasado 18 de outubro en Barcelona durante os disturbios tras coñecerse a sentenza do ‘procés’, regresará, previsiblemente este xoves, á cidade olívica.
Segundo puido confirmar Europa Press, o axente ferido, que sufriu un traumatismo cranioencefálico polo impacto dun obxecto contundente, será trasladado desde Barcelona nun avión medicalizado do Exército do Aire.
Fontes do sindicato policial SUP-Galicia sinalaron que, salvo cambios de última hora, está previsto que o avión aterre no aeroporto de Peinador á primeira hora da tarde deste xoves.
Iván A.F. pertence ao grupo ‘Raia 30’ da UIP da Comisaría de Vigo. O pasado 18 de outubro, na Praza Urquinaona, resultou ferido grave polo impacto dun obxecto contundente na cabeza, que lle provocou unha fractura na base do cranio e o esmagamento dunha vértebra.
O axente foi ingresado na UCI do Hospital Sant Pau de Barcelona. As súas condicións de saúde permiten o seu traslado a Vigo, onde está previsto o seu ingreso na UCI do Hospital Álvaro Cunqueiro.