O avión de carga AN-12 (voo UKL 4050) da compañía Ukraine Air Alliance, que saíu na pasada madrugada do aeroporto de Vigo e estrelouse preto da cidade ucraína de Lviv (Leópolis), causando polo menos cinco falecidos, transportaba pezas de automoción dunha factoría do Porriño (Pontevedra), con destino a unha fábrica de Turquía.

Así o confirmou en rolda de prensa o alcalde de Vigo, Abel Caballero, quen explicou que este avión, a bordo do cal viaxaban 8 persoas, levaba pezas de automoción procedentes da planta de Lear Corporation no Polígono das Gándaras. O seu destino era unha fábrica de automoción de Turquía.

De feito, o voo tiña como destino final Istambul, e tiña prevista unha escala técnica (para reposición) na cidade de Lviv, segundo apuntou o rexedor, que foi informado o suceso pola propia directora do aeroporto de Vigo.

ACCIDENTE

O sinistro produciuse á primeira hora da mañá, cando o avión tivo que realizar unha aterraxe de emerxencia nesta cidade do leste de Ucraína, ao quedar sen combustible. A bordo viaxaban 7 tripulantes e un acompañante.

O ministro ucraíno de Infraestruturas, Vladislad Kryklii confirmou a través de Facebook que polo menos cinco dos ocupantes da nave, dos que non transcendeu a súa identidade, faleceron no accidente.