Ferido grave un traballador tras quedar atrapado na prensa hidráulica do camión de recollida de lixo

Os feitos ocorreron sobre as 10,20 horas, cando o 112 recibiu o aviso de que se produciu este accidente, no Camiño Romeu, na parroquia viguesa de Coruxo.

Lixo
Fcc, flota de camións do lixo/Miguel Nuñez

Un operario do servizo municipal de recollida de lixos de Vigo resultou ferido grave este xoves tras escorregar e quedar as súas pernas atrapadas na prensa hidráulica do camión no que estaba a traballar, segundo informaron fontes policiais.

Os feitos ocorreron sobre as 10,20 horas, cando o 112 recibiu o aviso de que se produciu este accidente, no Camiño Romeu, na parroquia viguesa de Coruxo. Ata o lugar desprazáronse efectivos de Policía Local, Policía Nacional e bombeiros, ademais de emerxencias médicas.

Precisamente, foron funcionarios de bombeiros os que excarceraron ao traballador ferido que, inconsciente, foi trasladado en ambulancia medicalizada ao Hospital Álvaro Cunqueiro da cidade olívica. Trátase de J.A.M.R., un home de 50 anos de idade.