A Policía Nacional detivo a un home de 44 anos de idade de nacionalidade española e con domicilio en Vigo como autor dun delito de lesións por dar unha puñada a un menor e romperlle a mandíbula nunha pelexa multitudinaria.
Segundo informou a Policía Nacional, os feitos tiveron lugar da madrugada, cando se recibiu unha chamada na Sala Operativa do 091, na cal informaban sobre unha pelexa nas festas de Coia.
A dotación policial que estaba situada no lugar achegouse e foi requirida por un mozo que “sangraba abundantemente pola boca”, relataron as mesmas fontes, quen manifestou que momentos antes fora agredido por un grupo de homes na chaira da orquestra.
Un segundo indicativo policial chegou á festa e dirixiuse cara a un grupo de homes que estaban á beira do palco para proceder á súa identificación. Mentres isto acudiu a dotación asignada á festa acompañada polo menor agredido e pola súa parella, quen sinalaron a un dos individuos como o responsable da puñada que ocasionou as lesións ao mozo.
Estes homes ao ver que a parella os recoñecían como os seus agresores, comezaron “a porse violentos” e procederon “a gritar e insultar ao agredido e á moza”, destaca a Policía, á vez que tentaban achegarse a eles “en actitude ameazante”.
Tras identificar o home que o golpeou, os outros dous homes comezaron a pedir auxilio ao resto de feirantes, familiares e amigos alí presentes, que comezaron a congregarse ao redor dos policías.
“Nun momento dado, e na confusión propia do momento, este home propinou unha puñada no rostro a un dos axentes á vez que tentaba fuxir, tendo que ser contido co uso dos medios policiais dispoñibles“, asegurou a Policía.
Os familiares tentaron intervir nese instante e os axentes do segundo vehículo tiveron que actuar para conter a toda a xente que estaba no lugar da pelexa. Para evitar un enfrontamento cos familiares, os axentes actuantes procederon á detención deste home e ao seu traslado a dependencias policiais. Ademais, o segundo indicativo policial procedeu a escoltar ao persoal sanitario e á vítima para “evitar represalias dos familiares”, destacou a Policía.
Unha vez en comisaría realizouse unha comprobación das bases de datos policiais, na que se confirmou que ao detido constábanlle 11 antecedentes policiais anteriores. A detención foi levada a cabo por axentes do Grupo de Atención ao Cidadán, da Brigada de Seguridade Cidadá, pertencentes á Comisaría de Policía Nacional en Vigo-Redondela. O arrestado e todo o actuado foi posto a disposición do Xulgado de Instrución número 2 de Vigo, en funcións de garda.
