Un incendio queimou na noite deste martes parte dunha vivenda no lugar de Chaín, no termo municipal de Gondomar, pero non houbo persoas feridas.

Segundo informou o 112 Galicia, a pesar da que a casa está habitada, ninguén resultou ferido e o lume quedou extinguido pouco tempo despois.

Os feitos ocorreron sobre as 21,00 horas deste martes cando uns traballadores percibiron o incendio e chamaron ao 112 Galicia. A partir de aí, o Centro Integrado de Atención ás Emerxencias avisou aos Bombeiros do Porriño e aos membros do GES de Val Miñor co fin de atallar as chamadas que se concentraban na zona do tellado.

Sobre as 23,00 horas os efectivos de emerxencias deron por extinguido o incendio, que causou importantes danos no faiado, cociña, paredes e falso teito. Posiblemente, as causas sexan un curtocircuíto nun electrodoméstico, indicou o 112.

Ademais, como medida preventiva, por parte do 112 Galicia solicitouse a intervención do 061, pero ninguén resultou ferido. Este operativo completárono axentes da Policía Local.