A Garda Civil detivo en Nigrán (Pontevedra) a un home de 74 anos, natural da Coruña e con último domicilio coñecido en Madrid, ao que se lle atribúe a comisión de case media ducia de furtos cometidos durante os últimos meses en domicilios habitados na comarca de Val Miñor e Vigo.

Segundo relatou o Instituto Armado, o ‘modus operandi’ “comezaba por establecer unha discreta vixilancia sobre as vivendas que seleccionaba e aproveitaba a máis mínima ausencia dos moradores para acceder ao domicilio cando deixaban a porta aberta ou as chaves postas”.

“Entraba de forma moi coidadosa e buscaba os bolsos e as carteiras que atopaba nas habitacións máis próximas á porta de entrada”, indicaron as mesmas fontes.

A alerta recibida este luns 15 pola propietaria dunha vivenda en Nigrán informando de que sorprendera dentro da súa casa a un individuo “permitiu a súa inmediata localización pouco despois de darse á fuga, levando unha carteira que atopara na cociña”, sinalou a Benemérita.

O septuaxenario foi interceptado por unha patrulla de Seguridade Cidadá do Posto Principal da Garda Civil e Baiona-Nigrán cando circulaba nun vehículo de aluguer nunha rúa próxima.

No interior do turismo atopouse un cartón persoal de transporte público a nome do propietario dunha vivenda en Vigo, que sufrira o pasado mes de marzo un furto das mesmas características.

NUN HOTEL

Das investigacións realizadas púidose pescudar que esta persoa se atopaba aloxada nun hotel en Vigo e, ademais, vincúlaselle con outro tres furtos cometidos. En concreto, o 22 de febreiro en Nigrán, o 10 de marzo en Baiona e outro en 2017, tamén en Nigrán.

O detido, ao que ademais do cinco furtos atribúenselle outros tantos delitos de violación de morada, conta cun amplo historial de feitos delituosos similares na práctica totalidade do territorio nacional. O seu pase a disposición xudicial fixouse na mañá deste martes no xulgado de Instrución de garda de Vigo.