Un home faleceu este venres despois de incendiarse a súa vivenda situada en Montemogos, na parroquia de Beluso, no concello pontevedrés de Bueu. Segundo informou o 112 Galicia, o Centro Integrado de Atención ás Emerxencias (CIAE) tivo constancia do suceso pasados uns minutos das 6,30 horas deste venres.
Foi a Policía Local a que comunicou aos xestores de emerxencias a alerta dun incendio nunha casa unifamiliar en Bueu. Tras chegar ao lugar, os axentes aseguraron que se trataba dunha vivenda na que residía un home, aínda que, neses momentos descoñecían se se atopaba no interior da casa.
Por parte do 112 Galicia alertouse a Urxencias Sanitarias de Galicia-061, Bombeiros do Morrazo, Garda Civil e aos efectivos de Protección Civil. En concreto, o 061 desprazou ao lugar unha ambulancia e o equipo sanitario da PAC da zona que confirmou o falecemento dun home, J.M.A.B., de 56 anos de idade, sinalaron a Europa Press fontes sanitarias.
Unha vez no punto, os bombeiros, ademais de indicar que había un home falecido, confirmaron a extinción do lume na súa totalidade. Ardeu o salón por completo e o corredor da vivenda.