Morre un home en Mos tras quedar atrapado por unha árbore que estaba a tallar

Camiño do Porto, en Mos / Google Maps.

Un home de avanzada idade perdeu a vida este luns tras quedar atrapado debaixo da árbore que estaba a tallar na localidade pontevedresa de Mos.

Tal como informou o 112 Galicia, os servizos de emerxencia tiveron constancia dos feitos ao redor das 16,30 horas, cando un particular alertou de que un home quedara atrapado debaixo dunha árbore en Camiño do Porto, na parroquia da Igrexa do concello de Mos.

Así, o Centro Integrado de Atención ás Emerxencias (CIAE) avisou ao 061-Urxencias Sanitarias, que mobilizou ata o lugar unha ambulancia medicalizada. Ademais, solicitouse a colaboración dos Bombeiros do Baixo Miño, dos axentes da Garda Civil, da Policía Local e dos membros de Protección Civil da localidade.

Unha vez no lugar dos feitos, os servizos de emerxencia e, a pesar dos esforzos dos profesionais sanitarios por salvarlle a vida, só puideron confirmar o seu falecemento.

Neste sentido, fontes de Protección Civil aseguraron  que o señor, de avanzada idade, se atopaba tallando unha árbore, que lle acabou caendo enriba. Foi a súa muller “a que ao ver que tardaba moito en volver a casa” o atopou no lugar atrapado debaixo da árbore.