Axentes da Policía Nacional da Comisaría de Vigo detiveron a tres homes, de 18, 23 e 40 anos de idade, e veciños de Tomiño e A Guarda, como presuntos autores dun delito de receptación, tras ser sorprendidos circulando nun coche cheo de efectos roubados.
Segundo informaron fontes xudiciais, os feitos tiveron lugar cando unha dotación que realizaba labores de vixilancia e control no acceso á cidade de Vigo pola estrada de Camposancos observou un vehículo con tres ocupantes sospeitosos.
A Policía seguiuno discretamente ata a Avenida da Florida, onde interceptaron o coche. Ao rexistrar o seu interior, os axentes descubriron unha importante cantidade de diñeiro en efectivo, e varios obxectos sobre os que non puideron acreditar a súa procedencia.
Ante a sospeita de que puidese tratarse de efectos roubados, a Policía fixo unha inspección máis minuciosa e descubriu que baixo as tapas e cubertas do interior do coche, os seus ocupantes escondía numerosos obxectos: varias tablets, pantallas de sondas náuticas, amplificadores de sinal, teléfonos móbiles, aparellos electrónicos de barcos, xoias e outros artigos.
Todo o material figuraba denunciado como roubado, polo que os ocupantes do coche foron detidos e o vehículo foi retirado polo guindastre municipal. Unha vez trasladados a Comisaría, comprobouse que todos os arrestados teñen antecedentes policiais. Os detidos e as dilixencias practicadas foron postos a disposición do xulgado de instrución número 5 de Vigo.
Mentres, o material roubado xa foi devolto aos seus lexítimos donos, fóra dunha televisión de 32 polgadas e un trade con maletín ríxido, que seguen en dependencias policiais á espera de que os seus donos os reclamen.
