Un home de 51 anos e natural de vigo faleceu na madrugada deste sábado ao sufrir un paro cardíaco nos calabozos da comisaría da Policía Nacional da cidade olívica. O individuo fora detido previamente en Redondela polas forzas locais do municipio.
Segundo informa a Policía Nacional, o home foi apresado por causar problemas na vía pública, chegándose a enfrontar aos axentes locais moi agresivamente. Por iso, os axentes levaron ao home á PAC de Redondela.
Unha vez atendido, ingresou nos calabozos da Policía Nacional de Vigo e, tras realizar as dilixencias correspondentes e visto que a agresividade non remitía, solicitouse de novo a presenza dos servizos sanitarios.
Finalmente, o detido sufriu un paro cardíaco, polo que os profesionais tentaron reanimalo durante 30 minutos, producíndose finalmente o seu falecemento. Tras iso, a morte foi comunicada ao xulgado de garda, o que propiciou a presenza do médico forense e a retirada do cadáver ao Hospital Nicolás Peña para practicarlle a autopsia.