O alcalde de Vigo, Abel Caballero, volveu acusar este xoves á Xunta e ao Porto de “ocultar” que gran parte dos fondos cos que se financia o carril bici e senda peonil da fachada portuaria proceden da UE (asignados polo Goberno de España), e acusou ambas as institucións de facer “política sectaria”.
Nunha rolda de prensa, o rexedor olívico fixo mención a unha visita realizada ás obras desa senda este xoves polo presidente do Porto, Jesús Vázquez Almuíña e “por alguén da Xunta que non se sabe ben quen sería”, en alusión da delegada territorial, Marta Fernández-Tapias, e denunciou unha vez máis que, sendo unha obra cun 67 % de fondos procedentes do Goberno central, non se “convidou” a ningún representante do Executivo.
Abel Caballero tachou a visita de “descaro político” porque Xunta e Porto “camuflan” a achega de fondos europeos asignados polo Executivo “para que pareza só unha obra da Xunta”. “Pero non, tamén é do Goberno e esíxolles que o digan”, proclamou.
Por outra banda, apuntou que a actuación se fai en virtude dun convenio por 5 millóns entre Porto e Xunta, e reclamou un acordo coa cidade para facer un investimento por ese mesmo importe. “Eu tamén quero un convenio”, aseverou, á vez que lembrou que os fondos europeos asignados polo Goberno deben chegar tamén aos concellos, polo que advertiu: “Que non teña que ir aos tribunais”.
Así as cousas, o rexedor acusou a ambas as institucións de practicar a “política sectaria”, porque “non queren que a Vigo lle vaia ben”, e constatou que o presidente galego, Alfonso Rueda, “actúa infinitamente peor” que o seu antecesor, Núñez Feijóo. “Unha vez máis, marxinan á cidade. Isto é Rueda, un presidente da Xunta que non foi elixido polos cidadáns”, resolveu.
VISITA ÁS OBRAS
Na visita ás obras do tramo da senda, na contorna do Berbés, a delegada territorial da Xunta celebrou que se avance na recuperación da fachada marítima da cidade para “devolvela” á cidadanía. Este tramo, segundo confirmou Vázquez Almuíña, estará terminado na primavera, e conectará coa parte do carril bici que xa se abriu na zona de Beiramar. Posteriormente, licitarase o tramo que vai desde a Avenida da Coruña ata Bouzas.