Uns 4.000 expertos en urxencias e emerxencias sanitarias participarán no Congreso Nacional SEMES en Vigo

Celebrarase os días 8, 9 e 10 de xuño.

Unhas 4.000 persoas participarán no XXXII Congreso Nacional SEMES 2022, que se celebrará en Vigo no mes de xuño / Concello de Vigo.

Unhas 4.000 persoas participarán no XXXII Congreso Nacional da Sociedad Española de Medicina de Urgencias y Emerdencias (SEMES), que se celebrará en Vigo os días 8, 9 e 10 de xuño e que contará con máis de 140 actividades, 73 talleres e 50 mesas. Así o anunciou este xoves o comité científico e organizador do evento nunha rolda de prensa á que acudiu o alcalde da cidade e presidente da Federación Española de Municipios e Provincias (FEMP), Abel Caballero.

Segundo estes, o Congreso SEMES 2022 sitúase como un dos máis importantes de Europa en urxencias e emerxencias, polo que en xuño Vigo será a “capital europea” desta disciplina médica.

Preto de 4.000 profesionais, entre médicos, enfermeiros e técnicos de emerxencias sanitarias, participarán no encontro baixo o lema ‘Mar de Talento. Faro de Especialidade’, pondo sobre a mesa os principais desafíos aos que se enfrontan.

O funcionamento dos servizos de urxencias e emerxencias na xestión de catástrofes ou as recomendacións éticas na resurrección cardiopulmonar son algúns dos temas que se tratarán no Congreso.

“En España temos a sorte de contar con grandísimos profesionais, feitos a si mesmos, por vontade e cunha vocación enorme. E este Congreso é unha mostra da enorme autoformación que rodea a nosa profesión ao non ter a especialidade”, indicou o presidente de SEMES, Tato Vázquez.

MOMENTO “DECISIVO”

Pola súa banda, o presidente do comité organizador do XXXII Congreso Nacional SEMES, José Manuel Fandiño, reivindicou que a Sociedade está nun momento “decisivo”.

“Nunca estivo tan preto a consecución da Especialidade, pero tamén sabemos que os momentos decisivos son os máis duros, as resistencias multiplícanse e é o momento de presentar as nosas credenciais como colectivo”, engadiu.

Así mesmo, Caballero mostrou o seu orgullo ante a elección de Vigo para celebrar este Congreso, que mobilizará a entre 3.000 e 4.000 persoas, converténdoo no “máis importante” que recibiu a cidade na súa historia.

“En nome da cidade e no meu propio quérovos dar o meu recoñecemento, por estar en Vigo e polo voso traballo excepcional. Porque traballades nas circunstancias máis adversas que un pode ter”, subliñou o rexedor vigués.