O director xeral de Defensa do Monte, Manuel Rodríguez, asegurou que os incendios que a fin de semana pasada arrasaron con case 600 hectáreas en Salvaterra de Miño (Pontevedra) e O Courel (Lugo) foron “provocados por raios” procedentes das treboadas rexistradas naqueles días.
Así o confirmou nunha entrevista concedida este domingo a Radio Nacional, na que o director xeral destacou que precisamente as previsións meteorolóxicas foron as que “aconsellaban xa meter na quenda de gardas todo o persoal” de extinción, a pesar de que a tempada de alto risco empeza o 1 de xullo. “Xa temos o dispositivo ao completo”, garantiu.
Neste contexto, Rodríguez lembrou que o plan de prevención e defensa contra os incendios (Pladiga) deste 2021 prevé unha unidade dedicada exclusivamente á investigación dos incendios, que de feito terá “unha estrutura orgánica propia” vinculada á Dirección Xeral que dirixe.
Así, o ámbito de actuación deste persoal “xa non será o distrito ou o concello” onde estaban destinados antes os axentes, senón que xa será o “ámbito autonómico”. A intención da Xunta tamén é “profesionalizalos, especializalos e darlles unha formación específica” na investigación.
Ademais, Rodríguez subliñou que este ano hai como novidade unha aplicación que permite calcular o custo do que supón a intervención dos equipos de extinción ante un incendio. A modo de exemplo, estimou que o despregamento no Courel da semana pasada supuxo “ao redor de 570.000 euros”.
Non en balde, avisou que se alguén provoca un incendio “e se acredita a súa autoría”, váiselle imputar “todos os custos” do operativo, máis aló da tradicional vía penal nos tribunais. “Quen a fai a paga”, sentenciou o director xeral.
Please wait while you are redirected...or Click Here if you do not want to wait.
