Os pacientes Covid hospitalizados en Galicia ascenderon a 199, sete máis que a xornada anterior, mentres que os casos activos manteñen a tendencia ascendente por undécimo día consecutivo e sitúanse en 2.767.

Así se reflicte nos datos actualizados na mañá deste luns pola Consellería de Sanidade con rexistros ata as 18,00 horas deste domingo, nos que se inclúen 33 pacientes Covid en UCI –tres máis-– e 166 noutras unidades –catro máis–. 

Por áreas sanitarias a presión hospitalaria increméntase en seis das sete. Así, na de Vigo ascenden a cinco os pacientes Covid ingresados en UCI –un máis— e a 33 noutras unidades –un máis–.

MÁIS CASOS ACTIVOS

En canto aos casos activos, ascenden por undécima xornada consecutiva e sitúanse en 2.767, o que supón 74 máis, ao haber máis contaxios (154) que altas (78), ao que hai que engadir dous falecementos. Por áreas sanitarias, as infeccións activas increméntanse nas sete, con Vigo á cabeza con 26 novos casos. 

Por tanto, a área de Vigo mantense á cabeza, con 732; seguida da da Coruña e Cee, con 677; Pontevedra e O Salnés, con 448; Santiago e Barbanza, con 370; Ourense, 26; Lugo, 205; e á cola segue Ferrol, con 109.

NOVOS CONTAXIOS

En canto aos novos contaxios de Covid-19 detectados con calquera tipo de proba descenderon lixeiramente comparado coa xornada anterior a 154, o que supón 34 menos. Galicia confirmou nas últimas 24 horas 134 positivos por PCR, dos cales 31 corresponden á área da Coruña e Cee e 30, á de Vigo.

Pola súa banda, a taxa de positividade caeu neste inicio de semana a un 1,2 por cento, tras subir a un 3,5% a xornada anterior, polo que se mantén por baixo do 5% que a Organización Mundial da Saúde (OMS) fixa para dar por controlada a pandemia.