Redondela lembra os republicanos asasinados cun monumento

O conxunto escultórico foi elaborado pola Escola de Cantaría da Deputación de Pontevedra.

A alcaldesa de Redondela, Digna Rivas, e o deputado provincial do PSdeG, Santos Héctor Rodríguez, na inauguración do monumento en memoria dos asasinados por defender a República / Deputación.

O concello de Redondelarende homenaxe, desde este mércores, á memoria das persoas asasinadas por defender a República, cun monumento elaborado pola Escola de Cantaría da Deputación de Pontevedra, e que foi instalado no Alto da Concheira.

Ao acto de inauguración do conxunto escultórico (formado por tres siluetas humanas de granito cun buraco no peito) asistiron a alcaldesa deste concello, a socialista Digna Rivas, e o deputado provincial de Cooperación, Santos Héctor Rodríguez, así como representantes do Colectivo Republicano de Redondela, do Seminario de Estudos Redondeláns e da Asociación Fernando Monroy, de Cesantes.

Esta homenaxe coincidiu co 90 aniversario da proclamación do II República, e fíxose nun lugar no que foron asasinadas 21 persoas (a metade das que foron asasinadas en diferentes lugares deste concello, segundo asociacións pola memoria histórica).

Ademais, desde o Alto pode verse tamén a Illa de San Simón, que serviu como cárcere durante o franquismo e acolleu 6.000 persoas represaliadas polo réxime do ditador Franco. De feito, o Concello de Redondela declarou este 2021 como ‘Ano das Mulleres da Illa de San Simón’, en homenaxe ás coñecidas como ‘madriñas’, as mulleres que se ocupaban da roupa dos presos e utilizaban todo tipo de artimañas para facerlles chegar comida, medicamentos ou cartas.

Digna Rivas sinalou que Redondela “tiña unha débeda” cos colectivos de memoria histórica e coas familias que sufriron a represión franquista, e fixo especial mención ás ‘madriñas’, mulleres “valentes” que puxeron en funcionamento “unha rede solidaria” xogándose a súa vida e a dos seus seres queridos.

Así, o Concello inaugurará o próximo 23 de abril unha exposición fotográfica “para sacalas da invisibilidade e darlles o recoñecemento que merecen”. A mostra poderá visitarse primeiro na Alameda e logo viaxará a todas as parroquias.