O centro de saúde da localidade pontevedresa de Mondariz-Balneario reiniciou este luns a súa actividade, tras concluír a reforma integral pola que se renovaron todas as instalacións e dotouse dunha nova consulta médica ao inmoble.
Así o confirmou o Servizo Galego de Saúde (Sergas), que indicou que o obxectivo desta obra, que contou cun investimento de 115.000 euros, era ofrecer “unha mellor resposta ás demandas asistenciais deste municipio”, mediante unha mellora das infraestruturas de atención primaria.
En concreto, con estas obras reformouse a planta baixa do edificio, de forma que o espazo ocupado pola oficina de Correos pasou a destinarse a unha nova consulta médica. Ademais, construíuse un baño adaptado e un aseo, e adaptáronse dous locais para almacén e vestiario.
Igualmente, creouse un novo acceso á planta alta e renováronse todas as instalacións, incluíndo carpintarías interiores, falsos teitos e acabados interiores de toda a superficie da planta baixa.
O Sergas lembrou que mentres duraron as obras, as case 670 persoas con cartóns sanitarios asignadas ao centro de saúde de Mondariz-Balneario foron atendidas no centro de saúde do Concello de Mondariz.