O Xulgado de Instrución número 2 de Vigo, en funcións de garda, decretou o ingreso en prisión provisional, comunicada e sen fianza do presidente do Colexio de Enfermaría de Pontevedra, Carlos Fernández, a súa muller e a súa filla, investigados por delitos relacionados con supostas irregularidades na xestión das cotas do organismo colexial.
Segundo informaron fontes xudiciais, a causa séguese contra os tres por delitos de branqueo de capitais, falsidade documental e administración desleal. Ademais, o xulgado decretou o levantamento do segredo das actuacións.
Os tres investigados foron detidos este xoves, tras o que foron trasladados aos xulgados á primeira hora deste venres. Así, pouco antes das 13,00 horas compareceron ante o maxistrado, onde permaneceron na sala durante uns 20 minutos, aínda que se acolleron ao seu dereito a non declarar.
Fontes xudiciais comunicaron que se acordou o ingreso en prisión provisional deste tres persoas co obxectivo de evitar a ocultación, alteración ou destrución de probas relevantes na causa.
OPERATIVO POLICIAL
Carlos Fernández, a súa muller e a súa filla foron detidos nas últimas horas no marco dun operativo coordinado polo xulgado e levado a cabo por axentes da Unidade de Delitos Económicos e Fiscais (UDEF) da Policía Nacional.
Ademais das detencións, os axentes levaron a cabo senllos rexistros no domicilio do presidente do Colexio, e na sede do organismo, na rúa Aragón de Vigo, onde se incautaron de diversa documentación.
Fontes coñecedoras da investigación explicaron que o operativo está vinculado coa falta de pagamentos por parte do Colexio ao Consello Xeral de Enfermaría de España.
De feito, a entidade provincial xa foi condenada en dúas ocasións a abonar un total de 6 millóns de euros ao organismo estatal por non sufragar a porcentaxe correspondente das cotas que satisfán trimestralmente os colexiados.