A presión hospitalaria volveu baixar, neste caso lixeiramente con tres pacientes con Covid-19 menos ingresados en Galicia, ata os 366 hospitalizados, mentres que os contaxios diarios aumentan a 168 –que supoñen 16 máis que a xornada anterior–. Segundo os datos actualizados na mañá deste mércores pola Consellería de Sanidade con rexistros ata as 18,00 horas deste martes, hai 77 pacientes Covid en UCI na Comunidade galega –os mesmos que a xornada anterior– e 289 noutras unidades –tres menos–.
Os hospitalizados con este coronavirus aumentaron en tres das sete áreas sanitarias. En concreto, na de Pontevedra e O Salnés aínda que seguen nove persoas en UCI, soben a 23 as ingresadas noutras unidades –tres máis–; mentres que na da Coruña e Cee os críticos caen a 29 –un menos–, pero increméntanse a 112 os doutras unidades –tres máis–. Tamén na de Ferrol os pacientes con Covid-19 ingresados en UCI soben a seis –un máis–, mentres que os que permanecen noutras unidades mantéñense en 28.
Por contra, descenden os hospitalizados na área de Santiago e Barbanza, onde os críticos se manteñen en sete, pero caen a 40 os que se atopan noutras unidades –cinco menos–; mentres que na de Lugo os ingresados en UCI seguen en seis e redúcense a 20 os doutras unidades –dúas menos–. En canto á de Vigo, aínda que os pacientes con Covid en UCI se manteñen en 16, caen a 44 os doutras unidades –un menos–; e na área de Ourense hai catro en críticos –sen cambios– e 22 noutras unidades —un menos–.
VIGO, LÍDER EN CONTAXIOS
Os casos activos de Covid-19 seguen en descenso na Comunidade galega, con 165 menos, e sitúanse en 3.257. De novo, volven descender nas sete áreas sanitarias galegas, coa da Coruña e Cee como a única que supera o milleiro ao contar con 1.196. Pola súa banda, salvo a de Vigo, que rexistra 573; o resto teñen menos de medio milleiro de casos activos. Deste xeito, a de Pontevedra e O Salnés ten 419; a de Santiago e Barbanza, con 357; a de Ferrol, con 260; a de Lugo, con 244; e a de Ourense concentra 208.
En canto aos contaxios detectados con calquera tipo de proba aumentaron en 168 –tras iniciar a semana con 88 e rexistrar este martes 152–, dos que 142 foron positivos confirmados por PCR nas últimas 24 horas. Deses 142 positivos, 68 corresponden á área da Coruña e Cee; 23 á de Vigo; 16 á de Ferrol; 15 á de Pontevedra e O Salnés; nove á de Santiago e Barbanza; seis á de Lugo; e cinco á de Ourense.
Por tanto, os contaxiados en Galicia desde o inicio da pandemia ascenden a 114.041, dos cales 27.442 corresponden á área da Coruña; 21.435 á de Vigo; 18.123 á de Santiago e Barbanza; 14.656 á de Ourense; 12.503 á de Pontevedra e O Salnés; 11.808 á de Lugo; e 8.074 á de Ferrol.
TAXA DE POSITIVIDADE
A Comunidade galega efectuou ata o momento 1.733.389 PCR, o que supón 6.937 probas máis que as realizadas ata a xornada anterior –unhas 1.800 máis–. No relativo á taxa de positividade –porcentaxe de infeccións por test PCR realizados–, descendeu lixeiramente a un 1,6%, tras haber repuntado este martes a un 2% despois de situarse por baixo do 1% o luns. Deste xeito, Galicia continúa por baixo do 5% que a Organización Mundial da Saúde (OMS) fixa para dar por controlada a pandemia.
CINCO FALECIDOS
Ata o momento curáronse na Comunidade galega 108.520 pacientes de Covid-19, o que supón 328 máis que os contabilizados ata a xornada anterior. Desde o inicio da pandemia faleceron en Galicia diagnosticados con este coronavirus 2.283 persoas tras notificar na noite deste martes as autoridades sanitarias cinco novos falecidos. Estas cinco persoas tiñan patoloxías previas e unha delas procedía da residencia DomusVi Laraxe de Cabanas. Unha das mortes produciuse este martes 9 de marzo e as outras catro o día 8.
