O alcalde de Vigo, Abel Caballero, anunciou este martes “o maior certame de deporte urbano de Europa” para agosto de 2022 e, aínda que expresou o seu desexo de que sexa da man da organización do Marisquiño (que confirmou a súa marcha da cidade), garantiu que se celebrará o evento.

Así o trasladou nunha rolda de prensa, horas despois de que a organización de O Marisquiño confirmase que suspende a edición de 2021 e que marcha de Vigo ante a falta de apoio institucional (que concretou na redución dun 70 por cento nas achegas de Concello e Deputación).

O rexedor olívico afirmou este martes que, no segundo fin de semana de agosto de 2022, a cidade acollerá “un grandísimo certame de deporte urbano, o máis grande de Europa e o máis importante que se fixo nunca na historia da cidade”.

A preguntas dos medios sobre como se chamará o festival ou como se organizará, Caballero eludiu dar detalles, aínda que recoñeceu que lle gustaría que fose unha nova edición do Marisquiño, con cuxa organización, asegurou, o goberno local mantén unha relación “fluída”.