Investigadores da Universidade de Vigo e do Instituto de Ciencias Matemáticas (CSIC-UAM-UCM-UC3M) impulsan un proxecto, no que xa levan un ano traballando, que pretende detectar lixo no mar e monitorear a súa orixe e traxectoria ata a súa chegada ás costas e outros ecosistemas.
Esta iniciativa, denominada Bewats (Beach Waste Tracking System) e financiada polo programa Pleamar da Fundación Biodiversidade, pretende coñecer a orixe do lixo mariño e o percorrido que fan os residuos, para o que desenvolveu ferramentas de ‘monitoreo’ mediante imaxes de satélites e drones.
Ao longo do último ano os investigadores centráronse nas rías de Vigo e Pontevedra (incluíndo o Parque Nacional Illas Atlánticas), onde chegan residuos mariños, principalmente plásticos, impulsados polas fortes correntes oceánicas.
Entre os avances logrados, os investigadores Ana M. Mancho e Guillermo García, do CSIC, desenvolveron modelos para seguir as rutas destes residuos, baseándose nas correntes mariñas e grazas aos datos achegados polo Servizo de Monitorización Mariña Copernicus (CMEMS) e aos seus propios desenvolvementos. Con estes modelos pódese delimitar a orixe dese lixo nas diferentes épocas do ano.
Pola súa banda, os investigadores Fernando Martín e Orentino Mojón, do centro atlanTTic da UVigo, comezaron a tomar imaxes con drons en diferentes puntos das rías de Vigo e Pontevedra, baseándose no ‘software’ desenvolvido no proxecto europeo Litterdrone.
O proxecto Bewast acabará en abril, tras unha prórroga pola pandemia de COVID. En próximos meses, e ante a falta de datos ‘in situ’ para validar os datos remotos, os investigadores da UVigo crearán un obxecto de plástico a modo de branco flotante para capturar a súa imaxe por satélite e con drons.
Neste proxecto participou a empresa GMV, que desenvolveu un innovador enfoque baseado en datos remotos para a detección do lixo mariño usando imaxes Sentinel-2 (proporcionadas polo programa Copernicus) e técnicas de ‘machine learning’.
Ademais de procesar as imaxes para detectar os residuos, tamén se iniciaron as primeiras investigacións para identificar os tipos de plásticos.
