O Hospital de Viana nega o traslado de pacientes covid a Vigo

O hospital desminte a información e apunta que están a ser capaces de "responder ás necesidades de coidados intensivos".

Hospital de Viana do Castelo/Radio Alto Minho
Hospital de Viana do Castelo/Radio Alto Minho

Cruce de información contraditoria a respecto do traslado de pacientes covid de Portugal a Galicia. Horas despois de que a ministra de Saúde lusa anunciara que o Executivo portugués estaba a ponderar o traslado de enfermos covid ante as dificultades do seu sistema sanitario para dar abasto, La Voz de Galicia publicada unha información anunciando que Portugal estudaba “enviar os seus enfermos de UCIs de Viana do Castelo ao hospital de Vigo”.

O diario dos Fernández-Latorre aseguraba na información que, aínda que o Goberno luso “non confirmaba oficialmente” o traslado, o protocolo para desenvolvelo xa comezara. Menos de 24 horas pasaron antes de que a noticia de La Voz fora contradita polas autoridades sanitarias do propio hospital de Viana do Castelo do que, supostamente, terían que saír os pacientes camiño de Vigo.

“Logo de saír ao público unha noticia acerca da posibilidade de transferencia de doentes do Hospital de Viana do Castelo para Vigo, o Consello de Administración esclarece que non ten coñecemento oficial da situación relatada”, apuntaron cargos do centro hospitalaria nunha comunicación oficial.

“Ata o momento”, proseguen, “a Unidade Local de Saúde do Alto Minho foi capaz de responder ás necesidades de coidados intensivos dos doentes críticos, sen que fora necesario transferir doentes que esixen tal nivel de coidados”, engaden; desmentindo así a información antes apuntada.

DEIXAR UN COMENTARIO

Please enter your comment!
Please enter your name here