Abel Caballero compara a Feijóo con Nicolás Maduro por anunciar un proxecto para o Ifevi sen contar co padroado

O alcalde acusa a Xunta de querer "aforrar os 5,5 millóns da reforma das pistas de atletismo de Balaídos".

O alcalde de Vigo, Abel Caballero / Concello de Vigo.

O alcalde de Vigo, Abel Caballero, volveu a arremeter este xoves contra o presidente da Xunta, Alberto Núñez Feijóo, a conta do anuncio da construción dun módulo de atletismo no Instituto Feiral da cidade (Ifevi), que se faría de forma simultánea ás obras de ampliación do recinto.

O rexedor insistiu en que ese “cambio” no proxecto non foi trasladado ao padroado do Ifevi, polo que tres dos seus membros, Carlos López Font, Francisco Javier Pardo e Santos Héctor Rodríguez (todos eles concelleiros do goberno vigués) pediron formalmente unha reunión de urxencia do padroado para poder “coñecer” ese proxecto.

Segundo apuntou o alcalde, “tamén denuncian a falta de respecto de Feijóo”, por avanzar unha actuación sen consultala co órgano que rexe o recinto feiral. A xuízo do rexedor, “Feijóo empézase a parecer a Maduro en Venezuela” por actuar á marxe do padroado.

Así mesmo, Caballero insistiu na súa “preocupación” por se a construción do módulo de atletismo atrasa a ampliación do Ifevi e non está lista para a feira Conxemar, e por se este cambio no proxecto inicial “cumpre a legalidade” ou pode invalidar as expropiacións levadas a cabo polo Concello.

O alcalde denunciou que o goberno galego “quere atrasar a obra porque Conxemar non lle importa” e “quérese aforrar os 5,5 millóns da reforma das pistas de atletismo de Balaídos”, a pesar de que a administración autonómica asegurou varias veces que non renuncia a mellorar as actuais instalacións e que ten proxecto e orzamento, aínda que non licenza municipal, polos problemas urbanísticos da cidade.

Finalmente, Abel Caballero volveu insistir en que Zona Franca debe formar parte do padroado do Ifevi, xa que é un importante promotor económico da cidade e que, ademais, está disposta a achegar 5 millóns de euros.