O Concello de Ponteareas pide “extremar precaucións” ante o aumento de contaxios e prevé máis restricións

A incidencia da covid-19 é superior aos 250 casos por cada 100.000 habitantes.

Un traballador desinfecta un parque infantil de Ponteareas / Concello.

O Concello de Ponteareas fixo un chamamento aos veciños desta localidade para “extremar as precaucións” tras constatar un incremento no número de casos activos de COVID-19, que sitúan o concello nunha incidencia da pandemia superior aos 250 casos por cada 100.000 habitantes.

Así o trasladou a alcaldesa en funcións e concelleira de Saúde, Cristina Fernández Davila, que confirmou que, ata este luns, o número de casos activos neste pobo, de algo menos de 23.000 habitantes, é de 77.

Esta incidencia, vaticinou, fará vivir aos ponteareáns “novas restricións se así o determina a Xunta” no comité clínico deste martes, por iso apuntou que “todos” os cidadáns deben ser “responsables” e “extremar as precaucións”.

“Nas mans de todas e todos nós está facerlle fronte ao virus. A cifra pode obrigar a vivir novas restricións se así o decide a Xunta, por iso é indispensable que sexamos estritos, máis cívicos que nunca e que cumpramos a normativa”, afirmou a alcaldesa en funcións.

Nese sentido, Fernández Davila pediu “colaboración” dos veciños para que fagan só os desprazamentos indispensables, mantendo as distancias sociais, empregando en todo momentos as máscaras, e evitando ao máximo as reunións.

Así mesmo, lembrou a importancia de observar estas precaucións tamén nos locais de hostalaría, nos que só deben retirarse as máscaras no momento para comer e beber. “Temos que evitar a propagación do virus, mantendo controlado o número de casos positivos”, incidiu.

Finalmente, subliñou que a actual situación de crise sanitaria pon en risco, non só a saúde, senón tamén a economía do municipio, especialmente de comerciantes e hostaleiros, e lembrou a importancia de facer probas como os cribados. De feito, sinalou, eses cribados continuarán coa realización de probas a traballadores municipais e persoal dos centros educativos de Ponteareas.