O presidente da Xunta, Alberto Núñez Feijóo, indicou este luns que a posibilidade de intervir a residencia de Tui, onde se produciu “un gromo importante” de covid-19, está a ser sometida a análise e adoptarase unha decisión conforme aos criterios sociosanitarios que determinen os departamentos sanitario e de Política Social.
Así o trasladou na mesma xornada na que unha vintena de altas, 18 delas rexistradas en DomusVi Vimianzo, permite que, por primeira vez desde o pasado día 2 de xaneiro, se reduzan os casos activos de covid-19 entre os usuarios de residencias de Galicia. O balance que a Xunta publicou este luns, con datos actualizados a última hora do domingo, reflicte que hai un total de 268 anciáns en xeriátricos galegos diagnosticados de coronavirus.
A pesar das altas, DomusVi Vimianzo continúa como o xeriátrico que ten máis casos activos de covid-19 entre os usuarios, con 64. Segue a esta, precisamente, o xeriátrico Paz y Bien de Tui, con 51 anciáns infectados, e o da Pastoriza, con 36.