Un vixiante de seguridade fóra de servizo evita unha agresión a usuarios e persoal do hospital Povisa

UGT critica que o responsable de seguridade do hospital "limitouse a minimizar os feitos, desprezando o labor realizado por esta persoa".

Fotografía da fachada principal do hospital privado vigués / Roi González Villa
Fachada principal de Povisa / Roi González Villa.

Un vixiante de seguridade que se atopaba fóra de servizo evitou unha agresión a usuarios e persoal do hospital vigués Povisa, segundo informou a Federación de Servizos de UGT na cidade.

Os feitos ocorreron na tarde do pasado luns, cando este traballador se atopaba cun familiar no centro sanitario e presenciou como un individuo “nun estado moi alterado e agresivo” tentaba agredir a outros usuarios e a persoal de Povisa. O vixiante interveu para reducir a esta persoa, ata a chegada das forzas e corpos de seguridade.

A Federación de Servizos, Mobilidade e Consumo da UGT denunciou as “carencias” que hai en centros sanitarios con respecto a medidas de seguridade.

Así mesmo, criticou a actitude do responsable de Seguridade de Povisa que, segundo o sindicato, “lonxe de agradecer á intervención” deste vixiante, “limitouse a minimizar os feitos, desprezando o labor realizado por esta persoa”.

UGT quixo recoñecer a este vixiante e pór en valor o labor do colectivo de traballadores de seguridade privada, á vez que reclamou que os responsables de centros sanitarios, públicos ou privados, adopten “dunha vez por todas” as medidas necesarias para protexer tanto a persoal como a usuarios e os seus familiares.