Caballero pide á xente que non acuda o mércores ao aceso das luces de Nadal

O alcalde de Vigo sinalou que o "Nadal arrinca con Vigo" para "todo o planeta Terra". Tamén defendeu que a cidade vivirá un "grande Nadal" co fin de "espertar a ilusión" dos máis pequenos, que "o están pasando moi mal" coa pandemia.

Luces de Nadal © Miguel Nuñez

O Concello de Vigo decidiu adiantar o aceso da súa iluminación de Nadal para este mércores, ás 20,00 horas, ante a perspectiva de que o xoves (data fixada inicialmente) poida chover a esa hora, e dará o pistoletazo de saída á campaña do Nadal cun acto restrinxido, no que só haberá 50 invitados.

Así o confirmou en rolda de prensa o alcalde, Abel Caballero, quen explicou que, para o acto de aceso, pecharase a rúa Policarpo Sanz. Así mesmo, participarán uns 50 representantes de asociacións culturais, veciñais e sociais, gardando a distancia social, no marco das medidas para evitar a expansión da pandemia de COVID.

O rexedor, quen subliñou que “o Nadal arrinca con Vigo” para “todo o planeta Terra”, fixo un chamamento aos cidadáns: “Dígolle á cidade que non veñan presenciar o aceso. A rúa Policarpo Sanz estará pechada (…), que o sigan polos medios de comunicación, que haberá tempo de vir e velo, e haberá luces en todas partes”.

Caballero asegurou que a cidade volverá ter unha “magnífica iluminación”, aínda que sinalou que a campaña do Nadal non será como a do ano pasado, no que chegaron a pasar xunto ao gran abeto de luces “catro millóns de persoas, contabilizadas polos teléfonos móbiles dos maiores de 18 anos”.

No entanto, defendeu que Vigo vivirá un “grande Nadal” co fin de “espertar a ilusión” dos máis pequenos, que “o están pasando moi mal” coa pandemia. “Imos alegrarlles as festas”, proclamou, e reiterou que se tomarán medidas para garantir que a campaña teña “seguridade mil por cen” fronte ao COVID.