O xulgado do Contencioso Administrativo número 1 de Vigo ditou un auto no que ratifica a resolución da Dirección Xeral de Saúde Pública ordenando o illamento domiciliario obrigatorio dunha veciña da cidade por ter contacto cun caso positivo de COVID-19 e que acabou contaxiada.
Os feitos remóntanse a finais de outubro, cando esta muller, de 75 anos de idade e con varias patoloxías (entre elas, obesidade, diabetesa e problemas respiratorios), referiu a un médico mediante consulta telefónica que se atopaba “cansa”.
Ao día seguinte, 1 de novembro, nunha nova consulta telefónica á PAC, a muller detallou que tiña tose, cansazo e perdera o olfacto, e explicou que tivera contacto coa súa filla, que dera positivo por COVID-19.
Por iso, os servizos facultativos prescribíronlle a realización dunha proba PCR e indicáronlle que debía manterse en corentena domiciliaria. Dita proba foi realizada o 2 de novembro e, aínda sen coñecer os resultados, a muller foi o 3 de novembro ao centro de saúde de Teis, rompendo o seu confinamento, para recoller unhas agullas para inxectarse insulina.
No centro de saúde, o persoal que a atendeu comprobou que estaba pendente de coñecer o resultado dunha PCR e apercibíuselle por non quedarse na súa casa. A muller afirmou que non sabía que debía gardar corentena.
O 4 de novembro tívose noticia de que o resultado da proba fora positivo en COVID-19 e contactouse telefonicamente coa paciente pola mañá, pero ninguén respondeu á chamada. Sanidade notificou a situación á Policía Local de Vigo para que comprobase se estaba a respectar o illamento e, dous días despois, a Dirección Xeral de Saúde Pública ditou unha resolución de illamento obrigatorio, ata que a muller “deixase de representar un risco para a saúde pública”.
SOLICITUDE ANTE O XULGADO
O 9 de novembro a Consellería de Sanidade presentou ante o xulgado Contencioso Administrativo de Vigo unha solicitude para que ratificase esa medida de illamento obrigatorio, algo que fixo o xuíz a través deste auto, tras o aval do Imelga e a posición favorable da Fiscalía.
O maxistrado sinala na súa resolución que hai numerosa normativa e xurisprudencia que xustifica a adopción desa medida en aras de preservar a saúde pública, especialmente nun contexto como o actual de pandemia e tendo en conta que unha das principais medidas para cortar as cadeas de contaxio é o illamento de casos positivos ou de casos sospeitosos (para unha detección precoz).
No entanto, na súa resolución o xuíz tamén establece que o Sergas debe garantir que a muller é atendida das súas outras patoloxías mentres está en corentena, e que a súa situación se avaliará periodicamente. Así mesmo, Sanidade debe informar o xulgado cando desapareza o risco.
Por outra banda, pediu que se dea traslado deste caso aos servizos sociais do Concello de Vigo, por se a muller necesitase asistencia ou atención durante o período de illamento domiciliario.
