A alcaldesa do Porriño, Eva García da Torre, alertou de que a situación epidemiolóxica da localidade “continúa sendo grave“, segundo os datos facilitados polo conselleiro de Sanidade, Xullo García, que precisou que a localidade suma 80 casos positivos de COVID-19 e 254 persoas en illamento.
Durante unha reunión telemática mantida con alcaldes das localidades da área de Vigo incluídas no peche perimetral da mesma, García da Torre solicitou datos concretos da incidencia no municipio e información máis detallada. Así, trasladóuselle que cinco dos casos activos de COVID-19 no Porriño están relacionados cun brote detectado nunha industria cárnica que suma máis de 40 afectados. Así mesmo, as 254 persoas monitoradas no Porriño deben permanecer en illamento debido a que mantiveron contacto estreito cun positivo nas 48 horas anteriores a que fose diagnosticado.
Ante esta situación e o mantemento da localidade no máximo nivel de alerta epidemiolóxica, a alcaldesa volveu a pedir á cidadanía que “respecte os protocolos e as restricións establecidos, que buscan “protexer” e non molestar a ninguén”.
