Tui acollerá as primeiras xornadas dun taller contra a violencia machista no rural

O obxectivo do programa é atallar a "dobre discriminación" das mulleres do rural.

Concentración en Vigo en repulsa da violencia de xénero/ Miguel Núñez

Fademur puxo en marcha o programa ‘Cultivando Igualdade’ para impulsar actividades en favor das mulleres no ámbito rural e que estarán en marcha a partir deste mes de outubro. Así, levarán a cabo campañas de concienciación para a tolerancia cero da violencia machista en todas as súas formas. Haberá actividades en catro modalidades: talleres dirixidos a adolescentes e mulleres do rural, co fin de tecer unha rede de espazos seguros, visibilizar as distintas formas de violencia, informar os recursos e protocolos de actuación e traballar o empoderamiento e acompañamento das vítimas no seu proceso de saída.

As actividades presenciais levarán a cabo cumprindo as medidas de prevención en materia de covid en cada concello. O programa que se inicia neste mes de outubro, haberá actividades en Tui, Lugo, Forcarei, Vimianzo, O Grove, Rodeiro, Santiago de Compostela e Sobrado dos Monxes. Para novembro e decembro programaranse novos concellos.

20 ANOS DE EXPERIENCIA

Cultivando en Igualdade é un programa que xorde tras 20 anos de experiencia, co obxectivo de denunciar a situación de “especial vulnerabilidade” que sofren as mulleres ante a violencia de xénero e para promover a creación de espazos de seguridade persoal e colectiva para as mulleres do medio rural.

Así, a Federación de Asociacións de Mulleres Rurais (Fademur) presentou este programa co fin de continuar os traballos que realizou pola igualdade das mulleres que habitan e traballan no medio rural e contra as violencias machistas.

Fademur lembra a “dobre discriminación” que viven as mulleres rurais, esta iniciativa traballa co fin de pór o foco en como se caracteriza a violencia machista no medio rural e “cales son os factores que aumentan o risco” de que as mulleres sexan vítimas de violencia machista.

Por unha banda, sinalar a caracterización da violencia de xénero no medio rural implica profundar nas causas da invisibilidade e descoñecemento social, no silencio das vítimas, o illamento e a soidade, a falta de recursos especializados, as dificultades no acceso aos recursos e a falta de anonimato nos recursos de atención.

Por outro, ao falar de factores que teñen incidencia, hai que ter presentes tamén as dificultades para ter unha independencia económica e social, a falta de oportunidades laborais e educativas, a dificultade para cumprir ordes de afastamento, o control social, as estruturas de poder e a supervivencia dos roles sexistas.

DEIXAR UN COMENTARIO

Please enter your comment!
Please enter your name here