Queda escrito que a visita do rei Felipe VI a Tui levantará os ánimos. A chegada do monarca á vila pontevedresa -primeiro acto oficial que desenvolve logo de pasar dúas semanas alonxado da vida pública- recollerá á par xestos de simpatía e rexeitamento que, previsiblemente, quedarán recollidos en cánticos e pancartas para o recordo.
Así o apuntan os anuncios de ata tres plataformas e asociacións que nas últimas horas decidiron convocar sendas manifestacións na vila pontevedresa en apoio e rexeitamento ó rei. A visita do monarca chega nun momento de especial delicadeza para a casa real e a propia institución monárquica, co eco da fuxida do Emérito aínda no aire e a petición de múltiples formacións políticas -o BNG entre elas- de arrincar investigacións contra os Borbóns.
Esta será, probablemente, unha das esixencias máis repetidas na concentración desenvolta ao abeiro de Galiza Nova e o centro social Fuscallo. Baixo o lema “Galiza non ten rei” concentraranse na chamada popularmente como “praza dos cabalos” -no Paseo da Corredoira- ás 12 do mediodía de este mércores.
Tempo suficiente para que dea comezo e fin a outra das citas marcadas para a xornada. A escasos metros da Corredoira terá lugar -ás 10:45 da mañá- unha concentración de apoio ó monarca que será aloxada no clube náutico da cidade por iniciativa de Concordia Real Española.
MEDIDAS SANITARIAS
Tanto a plataforma pro-monárquica como a que pide a constitución de Galicia como unha república independente coinciden en facer un chamamento á responsabilidade e “rogar” ós seus asistentes que porten máscaras e garden a distancia de seguridade. A plataforma a prol de Felipe VI fixa a separación interpersoal a seguir en 2 metros.
ALCALDES DO BNG NON ASISTIRÁN AOS ACTOS CO REI
A Executiva Nacional do BNG acordou este martes que ningún representante dos concellos das Neves, Tomiño e O Rosal, gobernados polos nacionalistas, acudirá este mércores aos actos organizados na Comandancia Naval do Río Miño, en Tui, aos que asistirá rei Felipe VI.
A través dun comunicado, o Bloque apunta que os rexedores deste tres municipios –Xosé Manuel Rodríguez (As Neves), Sandra González (Tomiño) e Ánxela Fernández (O Rosal)–, que foron convidados o evento, non acudirán por considerar a monarquía “unha figura anacrónica e asociada a presuntas irregularidades económicas”.
“O BNG reafirma o seu compromiso coa defensa da soberanía nacional e a liberdade da nación galega para construírse nun Estado soberano, democrático, laico e republicano; a ‘República da Galiza'”, finaliza o comunicado.