O grupo municipal Marea de Vigo pediu este mércores “sensatez e contención” ao goberno municipal no gasto relacionado coa campaña de Nadal, especialmente ante as necesidades do comercio e a hostalaría, e cando non hai “garantías de retorno económico” para a cidade, no actual contexto de crise sanitaria pola pandemia de coronavirus.
Na mesma xornada na que o alcalde, Abel Caballero, asistiu ao comezo da colocación da iluminación do Nadal, que custará “soamente 800.000 euros”, o portavoz de Marea, Rubén Pérez Correa, sinalou que “parte dese gasto tíñase que estar a dedicar xa a axudas e liñas de avais por centos de negocios que están coa corda no pescozo na cidade”.
Ademais, sinalou que o gasto na campaña do Nadal debería cinguirse ao orzado, e non permitir que se incremente, como ocorreu o ano pasado. Co que se aforre, incidiu, deberían porse en marcha “políticas activas de axuda ao comercio e a hostalaría local”, que ata agora non tiveron unha “resposta activa” por parte do Concello.
“É, como mínimo, temerario fiar todo a unha campaña no mes de decembro, que está a expensas da situación sanitaria que podemos vivir, das restricións de acceso de persoas a espazos facilmente masificables“, apuntou, e lembrou que os negocios vigueses necesitan a axuda “agora”.
CRÍTICAS DO BNG
Na mesma liña, o concelleiro do BNG, Xabier Pérez Igrexas, que este mércores se reuniu coa deputada nacionalista (e portavoz de Comercio) Carmela González, criticou que o goberno de Abel Caballero “segue sen atender as demandas e reivindicacións” do sector comercial. “É intolerable que a única resposta do Concello de Vigo sexan boas palabras. O comercio da cidade necesita solucións, non que lle pasen a man polo lombo”, denunciou.
Con respecto ao acto de inicio da colocación da iluminación do Nadal, o edil do BNG reflexionou que “nun contexto tan duro, cos graves efectos que se están vivindo a nivel económico, laboral e comercial, non parece que o máis sensato e responsable sexa dedicarse a inaugurar o Nadal en pleno verán“.
Así, tras censurar que o goberno local non concretase o anunciado Plan de Recuperación con investimentos por valor de mil millóns de euros, advertiu de que “se non se toman decisións urxentes, o que van alumar as luces de Nadal van ser moitos comercios pechados e moitos empregos destruídos”.