Vigo terá “10 millóns de luces led” no Nadal e un “moi rigoroso” protocolo antiCOVID

O rexedor quere contar de novo cunha nora xigante e non descarta unha permanente: "Para facerlle a competencia ao London Eye"

O alcalde de Vigo, Abel Caballero, e a presidenta da Deputación e edila viguesa, Carmela Silva, xunto ao concelleiro Anxo Rivas, no acto de inicio de colocación da iluminación do Nadal, o 19 de agosto de 2020.

O alcalde de Vigo, Abel Caballero, asegurou este mércores que a cidade contará cun “Nadal cento por cento seguro” para os vigueses e para os turistas que visiten a urbe, atraídos pola iluminación, a decoración e outros eventos, xa que se porá en marcha un protocolo “moi rigoroso” de medidas preventivas para evitar posibles contaxios, no actual contexto de pandemia de coronavirus.

Así o trasladou o rexedor no acto de inicio da colocación da iluminación, que tivo lugar no centro da cidade, e ao que acudiron tamén a presidenta da Deputación de Pontevedra, Carmela Silva, e varios concelleiros do goberno vigués.

Caballero explicou que, nesta ocasión, a cidade lucirá 2.700 adornos luminosos, instalados en 334 rúas; e engalanaranse 450 árbores. “Vai haber 10 millóns de luces LED! Encántame dicilo, sei que esta frase vai dar a volta ao mundo”, proclamou, á vez que lembrou que o custo da iluminación desta campaña é de “soamente 800.000 euros” (é un contrato plurianual ajudicado hai 2 anos).

Preguntado polos medios acerca doutros elementos decorativos e atraccións, como a nora xigante instalada no pasado Nadal, Abel Caballero lembrou que esas cuestións aínda están en proceso de contratación. “Eu quero unha nora, e xa saben que non descarto pór unha permanente en Vigo para facerlle a competencia ao London Eye“, aseverou.

En todo caso, e á marxe do acto “cargado de simbolismo” da colocación da iluminación “do mellor Nadal do mundo“, Abel Caballero subliñou que, debido ao actual contexto de crise sanitaria, “vai haber cambios”, e anunciou un protocolo “moi rigoroso” con medidas de prevención para garantir a seguridade e evitar contaxios, e adaptado a diferentes posibles escenarios en función da evolución da pandemia.

PROTOCOLO “MOI RIGOROSO”

Así, aínda que non entrou en detalles, o alcalde de Vigo avanzou que se establecerán aforamentos nas rúas do centro, sen especificar como se van a controlar eses aforamentos; e sinalou que a gran árbore luminosa que, ata agora, se colocaba na Porta do Sol, trasladarase á rúa Policarpo Sanz, que conta con maior espazo.

Do mesmo xeito, confirmou que se repartirán as atraccións e decoración por diferentes zonas da cidade, e implantaranse “medidas moito máis estritas” que as normas xerais ditadas polas administracións. “Xa o fixemos nas praias, nas que hai seguridade ao cento por cento”, incidiu.