Condenada a 9 meses de prisión por perseguir “diariamente” á parella do seu ex-mozo e vixiala cuns prismáticos

A muller deberá indemnizar con 7.180€ á vítima, á que non poderá achegarse a menos de 100 metros.

Sala de vistas do Xulgado do Contencioso número 1 de Vigo durante un xuízo

Unha muller aceptou unha pena de 9 meses de prisión e pagar 7.180 euros en concepto de responsabilidade civil por perseguir e acosar á parella do seu exmozo, segundo determinou a xuíza da Sala do Penal 1 de Vigo, tras un acordo de conformidade que fixo innecesaria a celebración do xuízo

A acusada, M.J.P.A., enfrontábase a unha petición dun ano e tres meses de cárcere por un delito de acoso, pero finalmente aceptou os 9 meses de prisión. Así mesmo, deberá indemnizar á vítima en 7.180 euros polos días de baixa e polas secuelas que lle causou ese acoso; e impor tamén a prohibición de achegarse a menos de 100 metros da muller e do seu domicilio, e de comunicarse con ela por un período de 2 anos

ACOSO

Segundo o escrito de acusación da Fiscalía, M.J.P.A. mantiña, polo menos desde novembro de 2017, unha “actitude de persecución e confrontación” coa vítima, por mor de que esta iniciase unha relación co seu exmozo. Así, presentábase “diariamente” na estación de autobuses de Gondomar (Pontevedra) para atoparse coa vítima, que acudía a coller un bus para ir a Vigo a traballar. Á volta da xornada laboral, M.J.P.A. tamén a estaba esperando.

Tras unha intervención da Policía Local, a muller deixou de falar á parella do seu exmozo, pero quedaba mirando para ela fixamente, continuou perseguíndoa, ás veces ata o seu domicilio, presentábase nas cafetarías onde estaba, ou quedaba no exterior dos caixeiros automáticos cando a muller os estaba utilizando. Por riba, segundo as mesmas fontes, a acusada, vixiaba o seu domicilio cuns prismáticos, e mesmo chegou a perseguir á filla da vítima e a presentarse no traballo da súa irmá.

Toda esta situación provocou na parella do seu exmozo un trastorno adaptativo, que precisou tratamento farmacolóxico e, como secuela, quedou un trastorno derivado do eventual retorno do factor estresante.