O Hospital Álvaro Cunqueiro de Vigo tivo que trasladar a unha trintena de pacientes tras detectarse a presenza de pulgas nunha vela da segunda planta, a 2B, onde se sitúan servizos de Traumatoloxía e Cirurxía Plástica, segundo confirmaron a Europa Press fontes sanitarias.

Os feitos ocorreron o pasado fin de semana, cando un Técnico en Coidados Auxiliares de Enfermaría (TCAE) descubriu unha picadura, e púidose comprobar que había pulgas nesa zona do hospital.

Así, trasladouse aos pacientes que se atopaban no corredor 2B ao corredor 2A, que fora previamente liberada por se fose necesaria para pacientes de coronavirus. Así mesmo, contactouse coa empresa que o hospital ten contratada para realizar desinsectacións, que fumigou a zona.

Fontes do propio hospital precisaron que a aparición das pulgas é unha circunstancia allea á actividade interna do hospital, xa que proceden do exterior, e que xa desde o domingo a zona afectada quedou libre de pulgas. No entanto, os pacientes trasladados quedáronse na zona 2A para evitarlles a molestia dun novo cambio.