A Policía Local de Ponteareas detectou un “alarmante incremento” de infraccións por parte da cidadanía desde que se empezaron a permitir as saídas por franxas horarias á poboación xeral.
Nun comunicado remitido este sábado, este órgano local explicou que “desde o inicio do estado de alarma a Policía Local levantou un total de 114 actas de denuncia, das que máis de 20 se corresponden cos últimos días“.
En concreto, os axentes destacaron a gravidade de varios casos que se produciron neste concello pontevedrés. Denunciaron a tres adultos que celebraban unha festa con catro nenos pequenos no parque de San Roque, onde tiñan bebida e música.
Tamén sancionaron a unha persoa que padecía coronavirus e que foi interceptada nun control policial, a pesar de estar obrigada a permanecer no seu domicilio. Outro cidadán tivo que ser reducido e detido tras darse á fuga pola beira do Tea.
En xeral, as denuncias máis habituais refírense a saídas fóra dos horarios autorizados, persoas en grupos, acompañadas por outras alleas á unidade familiar e menores que saen con dous adultos. Tamén se detectaron infraccións nos horarios reservados para os menores nos que se observaron nenos e nenas compartindo xogos, polo que os seus pais foron denunciados por desatendelos.
Ante estes actos, o goberno local considera “preocupante” o nivel de incumprimento das normas “por unha parte pequena da poboación, pero que é suficiente para pór en serio risco o sacrificio e esforzo realizado por toda a poboación”.
Fixo fincapé en que “co comportamento incívico, insolidario e inconsciente as persoas infractoras están a contribuír a que se poida producir un rebrote da epidemia” cos seus consecuentes efectos sanitarios, sociais e económicos.
