A Policía Local de Vigo tramitou esta fin de semana outras 94 propostas de sanción contra cidadáns que infrinxiron o Real Decreto do estado de alarma, co que o número de denuncias tramitadas por este corpo policial desde que entrou en vigor a situación de excepcionalidade é de 463.
Así o trasladou o alcalde, Abel Caballero, nunha comparecencia na que concretou que as denuncias impostas o sábado foron 56, mentres que o domingo tramitáronse outras 38. Tratouse, segundo sinalou, de sancións por estar na vía pública sen xustificación.
Ademais das propostas de sanción, segundo lembrou o rexedor, a Policía Local mantivo o seu labor de control de vehículos, e sinalou que, durante o fin de semana, “paráronse” 42 coches na rúa Urzáiz, e “todos” estaban a circular por motivo xustificado.
“A cidade séguese comportando ben, con racionalidade, cordura e sentido común”, celebrou Caballero, quen volveu lembrar que se seguirá multando “os poucos que non son cívicos e poñen en perigo a súa vida e a dos demais”.
