O alcalde de Vigo, Abel Caballero, instou á Xunta a que implante a gratuidade do aparcadoiro do Hospital Álvaro Cunqueiro, nun “momento de pico de asistencia aos hospitais do Sergas” debido á crise sanitaria do coronavirus.
Nunha comparecencia de prensa, o rexedor olívico lembrou que o goberno municipal decidiu suspender a zona azul de aparcadoiro de pago e por iso instou á administración autonómica a tomar a medida “moi conveniente” de establecer a gratuidade do parking do hospital. “É imprescindible”, resolveu.
A ese respecto, subliñou que o Concello construíu, á beira deste centro sanitario, un aparcadoiro con 450 prazas gratuítas e que construiría outro se o Sergas cedese unha parcela no acceso ao hospital.
Caballero tamén puntualizou que o servizo de guindastre municipal non está a traballar como o fai habitualmente e que as retiradas de vehículos da vía pública fanse só en casos de “emerxencia”, como cando están estacionados en saídas de garaxes, encima de beirarrúas ou en zonas de carga e descarga (agora prioritarias para sanitarios). Así mesmo, confirmou que seguen activos os radares fixos, porque se manteñen as limitacións de velocidade e o pouco tráfico que hai debe seguir sendo seguro.
Por outra banda, o alcalde trasladou que, nas últimas horas, a Policía Local tramitou outras 25 denuncias contra persoas que se saltaron o confinamento decretado no estado de alarma, co que a cifra de propostos para sanción desde que entrou en vigor o Real Decreto xa é de 323. Ademais, nese período, foron identificadas 1.230 persoas e controláronse máis de 2.700 vehículos.
Adicionalmente, o alcalde lembrou todas as medidas postas en marcha desde a administración municipal para paliar os efectos da crise sanitaria, como axudas a familias para dar para comer aos nenos beneficiarios de bolsas de comedor, axudas para o pago de subministracións ou vivenda, atención a domicilio de colectivos vulnerables, ou aloxamento para 130 persoas sen fogar, entre outras.
Finalmente, e a preguntas formuladas telematicamente polos medios, o alcalde precisou que as obras municipais non se paralizarán, xa que non o esixe o Real Decreto de estado de alarma, e os traballadores están a operar coas medidas de prevención e seguridade, de acordo cos plans de seguridade e saúde laboral das empresas. “E eses traballadores levan o salario a casa todos os días, que é moi importante”, engadiu.