Ferido un garda civil tras fuxir un vehículo nun control contra o coronavirus na fronteira de Tui – Valença

Portugal fechará a súa fronteira este luns.

Garda Civil nun control / GC

Un garda civil resultou ferido leve nun control instalado na fronteira entre Tui-Valença para controlar o tránsito de vehículos entre os dous países no marco do Estado de Alarma decretado polo Goberno español e evitar o fluxo de viaxeiros a unha e outra banda da fronteira.

Segundo as fontes consultadas, o axente resultou ferido cando un dos condutores non parou e pasoulle coa roda por un pe. Nese momento iniciouse unha persecución que os levou xa a territorio portugués. As mesmas fontes indican que non foi precisa a hospitalización do axente.

PECHE DE FRONTEIRAS

Medios lusos dan por feito o peche de toda a fronteira portuguesa con España a partir deste luns pero só para turistas. Manterase o transporte de mercadorías e o tránsito de traballadores fronteirizos.

Así llelo trasladou o Primeiro Ministro luso, António Costa, ao presidente do Goberno español, Pedro Sánchez, nunha conversa mantida entre ambos os dous.

Así, a Garda Nacional Republicana ( GNR),o Servizo de Estranxeiros e Fronteiras ( SEF) e a Dirección Xeral de Seguridade ( DGS) serán as encargadas de pechar as principais fronteiras do seu país con España, o que incluiría os principais pasos co sur de Galicia, entre eles, o de Tui e Valença, o de Tomiño e Vilanova e Monçao e Salvaterra do Miño.

Ante o gran aumento de casos en todo o territorio español, o Goberno luso quere evitar a mobilidade de persoas entre as dúas fronteiras. Unha medida que afectaría a centos de galegos e de portugueses que traballan a ambos lados da raia.

1 COMENTARIO

DEIXAR UN COMENTARIO

Please enter your comment!
Please enter your name here