As medidas adoptadas pola Xunta para as bibliotecas públicas galegas, ante a crise polo coronavirus COVID-19, xerou malestar na Asociación de Profesionais dos Arquivos, Bibliotecas, Museos e Centros de Documentación, BAMAD Galicia, xa que entenden que se trata de directrices “confusas”, polo que expresaron a súa “disconformidade” sobre as mesmas.
Estas directrices indican que “as bibliotecas universitarias poderán admitir alumnado ata un terzo da súa capacidade, co fin de posibilitar a separación dos usuarios e dificultar a transmisión do virus”.
Tamén que “se suspende a apertura ao público de museos, arquivos e outros equipamentos culturais dependentes da Administración autonómica. No caso das bibliotecas, poderán permanecer abertas, limitando a súa capacidade ata un terzo do máximo permitido co fin de posibilitar a separación dos usuarios e dificultar a transmisión do virus. Así mesmo, recoméndase ás demais administracións titulares de equipamentos culturais a inmediata adopción de medidas semellantes”.
Ante isto, desde BAMAD pregúntanse “de que maneira se establecerá o control para non superar o aforo dun terzo do máximo de capacidade das bibliotecas”.
“Tendo en conta que o se establece o peche das ludotecas e espazos infantís, as bibliotecas permanecerán abertas pero pechando os espazos infantís? Descontarase do aforo máximo dos edificios a cantidade de persoas que poderían albergar os espazos infantís? Como distinguimos o servizo que temos que prestar por urxencia daquel servizo que pode esperar a recuperar a situación de normalidade?”, pregúntanse.
Esta asociación considera que “as directrices establecidas son canto menos confusas para os equipamentos culturais, mantendo uns centros pechados e outros con servizos limitados”.
Por outra banda, non entenden que “as autoridades establezan medidas de protección para todo os empregados públicos e manteña aos empregados públicos das bibliotecas universitarias e públicas en situación de risco, ademais do posible perigo para as persoas usuarias”.
É por isto que piden o peche inmediato de todas as bibliotecas.
Por outro lado, dada a situación actual, consideran “imprescindible a dotación aos arquivos, bibliotecas e museos xestinados pola Xunta de Galicia de materiais hixiénicos e desinfectantes”.
“Pensamos que estas medidas axudarán a clarificar os protocolos de actuación e a que todo o persoal destes centros colabore da mellor maneira na resolución desta situación”, engaden desde BAMAD.
TEMOR NA BIBLIOTECA DE VIGO
Na Biblioteca Pública de Vigo Juan Compañel, da Xunta, o ambiente é de temor entre o persoal. Sita na rúa Joaquín Yáñez,
Esta mañá, os traballodores levaban luvas e máscaras de protección. Unha medida que se viu aínda máis xustificada logo de vivirse un esperpéntico episodio neste centro este xoves, cando unha “muller sen protección entrou dicindo que tiña o coronavirus e paseouse pola biblioteca collendo libros”, explica unha traballadora.
Esta mesma semana, a biblioteca recibiu a visita de escolares do Centro de Educación Infantil e Primaria Balaídos, onde se confirmou, polo menos, un caso positivo de COVID-19.
É por todo isto que o persoal que traballa neste centro móstrase “moi preocupado” pola situación e non comprende que non se pechase.