CC.OO. esixe a inspección dos servizos médicos prestados en residencias tras rexistrarse contaxios

O responsable de Acción Sindical do sindicato de pensionistas de CC.OO. en Vigo, o secretario xeral do mesmo na zona e o secretario xeral da Unión de Xubilados e Pensionistas de UXT na área

O responsable de Acción Sindical do Sindicato de Pensionistas de Comisións Obreiras (CC.OO.) na área de Vigo, Domingo González, reclamou que a administración leve a cabo “unha inspección concreta en residencias públicas e privadas” para verificar se se prestan os servizos médicos obrigatorios tras rexistrarse contaxios por coronavirus en centros de distintas comunidades.

Así se pronunciou tras unha rolda de prensa celebrada este martes en Vigo, onde lembrou que o Covid-19 “afecta principalmente á poboación máis envellecida”. Así mesmo, o sindicalista denunciou que os servizos sanitarios regulamentarios “non se prestan en moitas residencias”, polo que instou á administración pública a comprobar o cumprimento da normativa nas mesmas.

Ademais, Domingo González advertiu da posibilidade de que algúns centros de maiores non dispoñan de “servizos de prevención de contaxios” tras sinalar que se dispararon “os casos rexistrados nos de distintas comunidades, o que provocou o peche dalgúns deles.

En concreto, a Comunidade de Madrid decretou o peche de centros de maiores para evitar contaxios tras detectarse unha trintena de casos en dous centros de maiores nun día. Así mesmo, no País Vasco e Aragón rexistráronse varios positivos en residencias.