A Fundación Provincial Banco de Alimentos de Vigo recolleu o pasado fin de semana, na que foi a primeira ‘Operación Quilo’ do ano 2020, uns 11.500 quilos de alimentos, nunha acción solidaria na que participaron 80 voluntarios nos dous centros do grupo Alcampo na cidade olívica.
Esta recollida permitirá repor os produtos básicos que “xa escaseaban” nos almacéns do Banco de Alimentos, tanto en Vigo como en Pontevedra.
A próxima ‘Operación Quilo’ terá lugar o fin de semana do 6 e 7 de marzo, dentro da campaña O Zampakilos Solidario promovido nunha trintena de establecementos da cadea Vegalsa-Eroski.
A Fundación fixo un chamamento á participación, xa que necesita a “colaboración urxente” de 500 voluntarios. Para sumarse a esta iniciativa, é necesario inscribirse na web https://www.bancoalimentosvigo.org/about-us/solicitude-de-voluntariado/ ou chamar ao número de teléfono 986.26.30.22.
Esta ONG, que acaba de cumprir 25 anos de actividade, repartiu ao redor de 1,8 millóns de quilos de alimentos durante 2019, atendendo a 20.000 persoas desfavorecidas na provincia, a través das 150 entidades homologadas coas que traballa.