O sur de Pontevedra, un exemplo na doazón de órganos

Os doantes increméntanse nun 32% respecto ao ano pasado no Chuvi.

Hospital operacion medicios Povisa
Sá de operacions do hospital © Miguel Nuñez

Os doantes de órganos incrementáronse nun 32 por cento respecto ao ano pasado, ata alcanzar os 29, no Complexo Hospitalario Universitario de Vigo (Chuvi). Segundo trasladou nun comunicado a xerencia da área Sanitaria de Vigo, esta cifra representa o dato máis elevado rexistrado no Chuvi desde que se iniciou esta actividade. Mentres, a taxa de negativas familiares á doazón situouse nun 12 por cento fronte ao 13,4 da media galega e o 14 por cento da estatal.

En concreto, extraéronse 99 órganos (sete corazóns, 24 fígados, 15 pulmóns e 54 riles) de 29 doantes, así como 54 tecidos (córneas, ósos, tendóns e segmentos vasculares). Deste xeito, as mulleres representaron o 65 por cento dos doantes, cuxa idade media se situou en 57 anos, e, os homes, o 35 por cento restante.

A principal causa de falecemento dos doantes foi un accidente cerebro vascular, que supuxo un 73 por cento do total dos casos, mentres os accidentes de tráfico só representaron o 3,5 por cento. Actualmente, case 32.800 persoas da área olívica contan co cartón de doante, o que supón o 27 por cento de todas as dispoñibles en Galicia.

Ademais, implantáronse 74 córneas, un 19 por cento máis que o ano anterior, e tres membranas amióticas no Chuvi. Tamén se levaron a cabo 50 transplantes de medula ósea, dos que 37 procedían do propio paciente, sete de doantes non emparentados e, os demais, doutras persoas.