Axentes da Policía Local de Vigo detiveron a un veciño da cidade, R.R.A.N., de 34 anos de idade, como presunto autor dun delito de violencia de xénero, tras ameazar de gravidade á súa parella, en presenza dos fillos de ambos, e outro de atentado contra axentes.
Segundo informaron fontes policiais, os feitos tiveron lugar á primeira hora da mañá deste mércores, cando unha dotación do 092 dirixiuse a unha vivenda da Avenida de Camelias, alertada por unha muller que chamou solicitando auxilio.
Cando chegaron ao domicilio, os axentes entrevistáronse cunha muller que relatou que o seu marido levaba varios días mostrando un comportamento moi agresivo cara a ela e cara aos fillos de ambos. Ese día, contou, o home chegou tarde a casa e, ante o reproche da súa parella, reaccionou con violencia e comezou a berrarlle e increparlle.
O home encarouse coa súa muller e ameazouna gravemente, antes de romper violentamente a mesa do salón da vivenda familiar, todo iso en presenza dos fillos. Cando a vítima lle advertiu de que ía chamar á Policía, o seu marido abandonou o domicilio.
O presunto autor destes feitos regresou á vivenda cando estaban alí os axentes policiais (aos que se uniron funcionarios de Policía Nacional), e mantivo a súa actitude hostil cando os axentes procedían a identificalo.
Así, propinou un lapote a un dos intervenientes, e negouse a facilitar os seus datos, elevando o seu nivel de agresividade, ata que insultou aos policías e abalanzouse sobre eles, tratando de agredilos.
Por estes feitos tivo que ser reducido, quedando detido como presunto autor dun delito de violencia de xénero e outro de atentado contra axentes da autoridade.