Os 1.300 funcionarios municipais de Vigo elixen este xoves ao novo comité de persoal do Concello

Concorrerán por primeira vez o sindicato CUT e o sindicato de policías municipais SPPME. Entre os retos que deberá afrontar o novo comité está o conflito de bombeiros e a suba salarial da Policía Local.

Concello de Vigo / Páxinas Galegas

Máis de 1.300 traballadores municipais de Vigo están chamados este xoves ás urnas para elixir aos 36 membros do novo comité de persoal do Concello olívico, nunhas eleccións sindicais nas que, por primeira vez, concorrerán o sindicato CUT e o sindicato de policías municipais SPPME.

O censo de traballadores do Concello está dividido en tres ‘colexios’: funcionarios (1.034 traballadores), persoal laboral e técnicos (255 traballadores) e especialistas (83 traballadores). Todos eles poderán exercer o seu dereito ao voto de 9 a 17 horas no vestíbulo do auditorio municipal.

Nestes comicios, presentarán listas os sindicatos SICO, UGT, CC.OO., CIG, CUT e SPPME para o colexio de funcionarios, mentres que para representar ao resto de traballadores, haberá candidaturas do catro primeiras centrais.

Dos 36 membros do comité de persoal municipal, 23 serán elixidos o colexio de funcionarios, mentres que persoal laboral e técnicos elixirán a 10 representantes, e os especialistas a 3 delegados.

Nas eleccións de 2015, o SICO volveu obter a maioría de delegados, con 12 representantes en total, mentres que UGT obtivo 10 delegados, CIG obtivo 8 e CC.OO. obtivo 6. Un acordo entre UGT, CC.OO. e CIG deu a presidencia do comité a Pergentino Martínez (UGT).

Entre os retos que deberá afrontar o novo comité está o conflito de bombeiros (en folga indefinida desde mediados de agosto por falta de persoal), as reclamacións da Policía Local sobre equiparación salarial, os procesos de funcionarización ou a execución das Ofertas Públicas de Emprego pendentes.