O Tribunal Administrativo de Contratación Pública de Galicia (TACGal) ditou resolución desestimando o recurso interposto pola asociación Vigo Histórico e outras persoas contra as obras de peonalización de Porta do Sol, que inclúen a construción dun túnel para soterrar o tráfico, por considerar, entre outras cousas, que os recorrentes non están lexitimados, ao non ser licitadores.

Na súa resolución, este tribunal sinala que este tipo de recursos son instrumentos para os licitadores que participan nun proceso de adxudicación dunha obra e, en todo caso, sinala que os recorrentes non critican ese proceso, senón que reclaman a nulidade do acordo da Xunta de Goberno na que se aprobou a adxudicación.

Así mesmo, na resolución indícase que Vigo Histórico e os demais afectados basean o seu recurso en actos e acordos previos que “non foron impugnados”, e que mesmo trata aspectos “alleos” á propia contratación, como consideracións urbanísticas ou ambientais.

O alcalde de Vigo, Abel Caballero, deu a coñecer este venres esta resolución, e celebrou que o TACGal “lle dá a razón ao Concello” olívico, fronte a un grupo de persoas “que tentan defender os seus privilexios e danar a cidade”.

O rexedor confirmou que, tras esta resolución, o Concello está en condicións de “asinar o contrato” e iniciar a reforma de Porta do Sol, polo que os traballos comezarán tras o Nadal.

VIGO HISTÓRICO

Pola súa banda, a Asociación Vigo Histórico compareceu este venres ante os medios para explicar as razóns da presentación do recurso, e avanzaron que presentarán un deseño alternativo para a reforma da Porta do Sol.

No seu recurso, este colectivo aludía ao feito de que o proxecto, tal e como foi deseñado, non se pode executar, porque os planos utilizados “non reflicten a realidade construtiva das edificacións” e que hai un “grave e inminente risco de derrube dos edificios afectados”.

Tamén denunciaron un suposto incumprimento dos requirimentos legais no proceso de licitación, porque non se xustifica adecuadamente a necesidade desta actuación, e alertaron de que a obra non cumpre os obxectivos recollidos no regulamento dos fondos FEDER e que é contraria ás políticas ambientais impulsadas desde Bruxelas.

Agora, tras coñecerse a resolución do TACGal, advertiron de que a obra que pretende executar o Concello “non é unha simple pavimentación” e que seguirán adiante coas reclamacións.

Polo momento, atópanse á espera de que se responda ás peticións de “revisión de oficio” presentadas ante o Concello e a Dirección Xeral de Patrimonio da Xunta. Se esta vía non prospera, avanzaron, acudirán á vía contencioso administrativa, porque o Tribunal de Contratos, “nin moito menos di que o Concello o fixese ben, e non entra no fondo do asunto”.