O policía vigués ferido nos disturbios en Barcelona evoluciona “ben” na UCI

O SUP confirma que o axente vigués non ten afectada a mobilidade. O policía da Coruña tamén ferido será operado este luns. O xefe superior deste corpo destaca o "bo ánimo" dos 260 efectivos galegos despregados.

O presidente do Porto de Vigo, Enrique López Veiga;o alcalde, Abel Caballero, a subdelegada do Goberno, Maica Larriba; e o xefe superior de Policía de Galicia, José Luís Balseiro / Europa Press.

Os dous axentes das Unidades de Intervención Policial das Comisarías de Vigo e A Coruña que resultaron feridos nos disturbios en Barcelona o pasado venres evolucionan das súas lesións e, mentres que o policía vigués permanece na UCI, “aínda que a súa vida non corre perigo”, o axente da comisaría herculina será intervido este luns polas feridas no seu brazo dereito.

Así o confirmaron o xefe superior de Policía de Galicia, José Luís Balseiro, e a subdelegada do Goberno en Pontevedra, Maica Larriba, tras participar na inauguración dun curso sobre seguridade nos portos, que se celebra na cidade de Vigo.

O xefe superior de Policía de Galicia confirmou que o axente Iván A.F., da UIP da Comisaría de Vigo, que sufriu un traumatismo cranioencefálico, permanece na UCI, aínda que “pasou boa noite” e “evoluciona levemente, pero ben”.

No caso de Ángel, o funcionario da Comisaría da Coruña que sufriu unha lesión no seu brazo dereito, será intervido este luns e, segundo explicou Balseiro, que puido falar con el o pasado sábado, “atópase ben” e ten “bo ánimo”.

MOBILIDADE DO FERIDO

O sindicato policial SUP confirmou este luns que o axente da Comisaría de Vigo non ten afectada a mobilidade e que os seus problemas pulmonares evolucionan “ben”.

O responsable do SUP en Galicia, Roberto García, explicou que o TAC realizado ao axente “deu resultado sen afectación á mobilidade”. Así mesmo, indicou que “os pulmóns avanzan moi ben”.

O responsable deste sindicato, ao que pertence o policía ferido, tamén trasladou que, se Iván “segue así”, “está previsto que o esperten esta tarde noite”.

EFECTIVOS DE COMISARÍAS GALEGAS CON “BO ÁNIMO”

O xefe superior confirmou que os efectivos procedentes das comisarías galegas despregados en Cataluña, uns 260 funcionarios (entre axentes e o subgrupo de mando) que integran os grupos da Unidade de Intervención Policial de Galicia, mantéñense “cun ánimo moi bo”.

“A UIP ten unha ampla rodaxe en conflitos de orde pública. Están moi rodados, para eles é o seu traballo ordinario”, sinalou. E confirmou que a súa permanencia en Cataluña está determinada polo que decidan os responsables policiais que avalían o dispositivo despregado, e que van decidindo os recursos necesarios en cada momento.

ACTUACIÓN “CON MESURA E PROPORCIONALIDADE”

Pola súa banda, a subdelegada do Goberno en Pontevedra, Maica Larriba, defendeu o papel que están a xogar tanto Policía Nacional, como Garda Civil e Mossos, que actúan “con mesura e proporcionalidade para garantir os dereitos e liberdades constitucionais dos cidadáns de Cataluña e de todo o Estado”.

Larriba dedicou un “recordo especial” aos axentes feridos e, en concreto, aos dous funcionarios das comisarías de Vigo e A Coruña. No caso do primeiro, subliñou que, aínda que continúa na UCI, “a súa vida non corre perigo”, segundo os datos de que se dispoñen ata o momento.

Así mesmo, destacou que, “desde o primeiro momento”, houbo contacto coa muller de Iván, e a Comisaría Xeral puxo á súa disposición os medios para que se desprazase a Barcelona e poida acompañar ao seu marido. “Desde o domingo á primeira hora está co seu marido, e está máis tranquila”, sinalou a subdelegada, e expresou o seu desexo de que a recuperación de Iván e de Ángel sexa “o máis rápida posible”.

MÁIS APOIOS

Por outra banda, tamén trasladaron o seu apoio ás Forzas e Corpos de Seguridade despregados en Cataluña tanto o presidente do Porto de Vigo, Enrique López Veiga, como o alcalde da cidade olívica, Abel Caballero, durante a súa intervención no curso de seguridade portuaria que se inaugurou na mañá deste luns.

Así, López Veiga lembrou “o que custou” que España fose un país democrático e agradeceu aos axentes que estes días están en Cataluña a súa “defensa da Constitución, o Dereito e a democracia”. “Temos que estar moi orgullosos e agradecidos ás Forzas e Corpos de Seguridade do Estado”, proclamou, e trasladou a estes axentes o “agarimo, gratitude e admiración” dos cidadáns.

Mentres, o alcalde defendeu o papel “vertebrador” da Policía en España e subliñou que “este é o momento” de que todos se poñan “á beira” deste corpo de seguridade. “Os policías en Cataluña están a defender a democracia e a unidade de España, porque os españois queremos seguir xuntos”, aseverou.

“Non imos deixar que ninguén pola forza violente o dereito e a Constitución”, advertiu Abel Caballero, quen enviou “un abrazo” a todos os efectivos despregados en Cataluña, “que fan o seu traballo con profesionalidade e mesura”.

Así mesmo, fixo mención especial aos axentes feridos e, en concreto, ao vigués Iván A.F., con cuxa muller puido falar para trasladarlle o apoio “en nome da cidade”. “Desexamos mellores tempo en Cataluña pero, nestes tempos, tedes o noso recoñecemento, apoio e agarimo”, sentenciou.

MENSAXE DO PPdeG

O portavoz parlamentario do PPdeG, Pedro Puy, trasladou a súa solidariedade á familia do axente vigués ferido e desexoulle “unha pronta recuperación”.

Tras acudir con outros dirixentes do PPdeG á concentración en Compostela en apoio dos axentes despregados en Cataluña, Puy remarcou que a situación é “moi complexa” e requiriu desprazar desde Galicia a varias unidades policiais “coa mala sorte” de que o ferido máis grave sexa de Vigo.