A presidenta da Federación de Veciños Eduardo Chao (Favec) de Vigo, María Pérez, entregou en representación desta entidade unha proposta para mellorar as conexións do transporte público entre o Hospital Álvaro Cunqueiro e distintas parroquias e a remunicipalización do servizo no rexistro do Concello.
Durante unha rolda de prensa celebrada este luns antes da presentación do escrito, a presidenta da asociación veciñal defendeu a remunicipalización do servizo de transporte público, dado que, segundo insistiu, non levaría un desembolso económico para o Consistorio debido a que non conta con débedas acumuladas.
Así, remarcou a necesidade de contar cun servizo público que conte conexións entre as parroquias e distintos puntos da cidade e de dotar a zonas como Coruxo, Saiáns, Navia, Bembrive e Oia de novas liñas ao Hospital Álvaro Cunqueiro, iniciativas que xa presentaron veciños dalgunhas delas en xaneiro.
Entre as propostas recollidas no documento presentado tamén se incluíron suxestións relativas á atención ao cliente e á extensión da gratuidade do servizo aos parados que non cobren prestacións por desemprego.
