Vídeo: Bronco pleno cos bombeiros recriminándolle ao goberno local “se vos arde a casa, a ver quen vola apagar”

A moción do BNG sobre a situación dos bombeiros de Vigo queda sen debater por non estar xustificada a urxencia

Bombeiros protestan no pleno © Miguel Nuñez

Bronco pleno no Concello de Vigo tras a decisión de Carmela Silva, presidenta en funcións do pleno, de non debatir unha moción do BNG sobre a situación do corpo de bombeiros da cidade. Unha decisión que provocou a airada protesta dun grupo de bombeiros que asistiron á sesión como público, con camisetas vermellas coa lema ‘Non todo é o que parece’, e carteis coa frase ‘Vigo sen bombeiros non é segura‘.

Non tedes vergoña, xogades coa vida dos vigueses“, “Vivides nunha mentira”, “Mañá que vos arda a casa, a ver quen vai apagar”, foron algunhas das frases coas que os bombeiros increparon aos membros do goberno municipal.

MOCIÓN

A protesta tivo lugar logo de que se desestimara a moción urxente presentada polo concelleiro do BNG, Xabier Pérez Igrexas, sobre a situación “límite” dos bombeiros da cidade, por, segundo explicou o secretario municipal, non cumprir os requisitos de urxencia que recolle o regulamento.

Así, o edil nacionalista rexistrou unha moción na que reclamaba que se constitúa unha mesa de negociación co comité de folga de bombeiros (levan 3 semanas de paro indefinido), que se elimine o decreto “abusivo” de horas extras sen comprometer a seguridade dos cidadáns e dos bombeiros, que se executen as OPE pendentes coa maior celeridade posible e que se busquen fórmulas para, de forma inmediata, reforzar o persoal do servizo.

Votación no salón de Plenos do Concello de Vigo. PAULA XUSTO-EUROPA PRESS

Na exposición de motivos dáse conta da escaseza de efectivos neste servizo esencial (o comité de folga denuncia que non se cobren nin sequera os servizos mínimos decretados), e critícase que a “única” resposta do goberno de Abel Caballero ás demandas destes traballadores fose “negar o problema”.

Con todo, a moción non chegou a debaterse, nin no fondo nin na urxencia porque, segundo explicou o secretario municipal, José Risco, o regulamento do Pleno contempla que as mocións urxentes son aceptadas no caso de que ocorran “acontecementos relevantes” entre a convocatoria da sesión e a celebración da mesma.

A ese respecto, o secretario lembrou que tanto a convocatoria de folga como a publicación do decreto de servizos mínimos foron anteriores á convocatoria do Pleno. Por iso, a concelleira Carmela Silva, que nese momento presidía a sesión, deu por resolta a cuestión e pasou ao momento seguinte da orde do día.

Por outra banda, no capítulo de rogos e preguntas, o edil do BNG, Xabier Pérez Igrexas, expresou a súa protesta por considerar que se vulneraron os seus dereitos, ao non deixarlle intervir cunha ‘cuestión de orde’; mentres que a concelleira de Marea, Oriana Méndez, reclamou que o goberno se reúna co comité de folga de forma urxente, nun prazo de 24 horas.